Мұса Жәлел ескерткіші ашылды

Өскеменде татар халқының белгілі ақыны, Кеңес Одағының Батыры Мұса Жәлелдің ескерткіші ашылды. Тарихтан белгілі, Мұса Жәлел 1942 жылы ауыр жараланып, тұтқынға түседі. Концлагерьде жасырын топ құрып, кеңестік тұтқын-жауынгерлердің лагерьден қашуын ұйымдастырады. Оның жазған өлең-жырлары тұтқындағы серіктерінің арасында кеңінен таралады. Ол құпия ұйым құруға қатысқаны үшін Плетцензее әскери түрмесінде өлім жазасына кесілген. Облыс орталығының Про­тозанов пен Қайсенов көшелерінің қиылысында бой көтерген ескерткіштің ашылу салтанатына Татарстан Республикасының мәдениет министрі Айрат Си­ба­ғатуллин бастаған меймандар келді. Делегация құрамында «Та­тарстан – жаңа ғасыр» телеарнасының түсірілім тобы да бар. Сондай-ақ, шараға еліміздің Парламент Мәжілісінің депутаты Светлана Ферхо, облыс әкімінің орынбасары Жақсылық Омар, Өскемен қаласының әкімі Темірбек Қасымжанов, облыстық татар этномәдени бірлестігінің жетекшісі Ғабдулхай Ішмұратов және өңірдегі татар этносының өкілдері қатысты. – Ескерткіш қысқа мерзімде тұрғызылды. Оған қаладағы барлық этномәдени бірлестіктер, кәсіпкерлер мен қаланың қара­пайым тұрғындары атсалысты. Олардың барлығына алғыс айтамыз. Бұл – біздің еліміздің бірлігі мен достығының айнасы. Біз бірге болғанда барлық игілікке қол жеткіземіз! – деді шаһар басшысы Темірбек Қасымжанов. Ескерткіштің ашылу рәсімінде Ұлы Отан соғысының ержүрек батыры туралы сыр шертіліп, жауынгердің жалынды жырлары оқылды. Ақынның өзі де жыр жолдарында «Өлімнен кейінгі ғұмыр жалғастығы үшін де өмір сүру қажет» екенін айтып кетті емес пе?! Ұлы  Жеңістің 70 жылдық мерейтойы аясында бой көтерген ескерткіш татар ақынының есімі әлі ел есінде екенін аңдатты. Аталған шара этноауылда татар халқының ұлттық Сабантой мерекесімен жалғасты. Думан АНАШ, «Егемен Қазақстан». ӨСКЕМЕН.