Облыс әкімі Ербол Қарашөкеев бастап, Тараз қаласының әкімі Бақытжан Орынбеков қоштап, облыс орталығын көркейту, қоршаған ортаны қорғау бағытында облыс орталығында тұрақты түрде сенбіліктер, түрлі акция ұйымдастырылып отырады. Бұдан бөлек, Тараз қаласында жасыл желекті түгендеу, цифрландыру жұмысы қарқынды түрде жүргізіліп жатыр. Ресми дерекке жүгінсек, алдағы күндері арнайы сайт іске қосылады. Мұнда облыс орталығындағы дерекқордың бірыңғай жүйесі қалыптастырылады.
Жергілікті атқарушы билік өкілдері Тараз қаласында жаңадан құрылған екі ауданды көркейту жұмысына айрықша назар аударып отыр. Осы орайда «Жібек жолы» ауданына қарасты «Қызылабад» тұрғын алабында арнайы сенбілік ұйымдастырылып, алғашқы кезеңде 10 мың түп қарағаш көшеті егілді.
Жаңа ауданның келбетін қалыптастыруға ден қойған жұрт елдік іске жұмылған жұдырықтай ұйымшылдықпен кірісті. Іс-шараға атсалысқандардың қатарында мемлекеттік мекеменің қызметкерлері, жастар, еріктілер бар. Жалпы саны үш мыңға жуық адам қатысып, белсенділік көрсетті. Экологиялық акцияға өңір басшысы Ербол Қарашөкеев пен Тараз қаласының әкімі Бақытжан Орынбеков те қатысты.
Экологиялық акция Тараз қаласының өзге де шағын аудандарында ұйымдастырылды. Атап айтсақ, қала аумағында жарияланған санитарлық-тазалықтың екі айлығы аясында «Жансая» шағын ауданында жалпықалалық сенбілік өтті. Сенбілікке 250-ге жуық адам, 7 арнайы техника жұмылдырылып, нәтижесінде 70 текше метрге жуық қоқыс сыртқа шығарылды. Қаладағы өзге де учаскелерде тазалық жұмыстары жүйелі түрде атқарылды.
Жалпы, акция аясында жыл басынан бері шаһар аумағында сенбіліктер тұрақты түрде ұйымдастырылып келеді. Іс-шара барысында кәсіпорындар мен мекемелерге, барлық бизнес өкілдеріне тазалық жұмыстарын жүргізетін аумақтар бекітіліп, 30 мыңға жуық адам атсалысты. Нәтижесінде, бүгінге дейін жоспарланған 15 шақырым арық жүйесі, 230 шақырымдай көше, 400 мың шаршы метрге жуық саябақ алаңдары тазаланды.
Жергілікті атқарушы билік өкілдері Тараз қаласының абаттандыру жұмысына айрықша көңіл бөліп отыр. Осы мақсатта көгалдандыру, жасыл аймақ құру жоспарына сәйкес «Жасыл белдеу» бағдарламасы қабылданған. Бұл бағдарлама аясында 2023–2024 жылдары жыл сайын 20 га жерге 20 мың көшеті отырғызылды. 2025 жылдың көктем айларында 10 мың түп ағаш егілді, күз айларында тағы да 10 мың түп егу жоспарланған. Бұған қоса, қаланың орталық көшелеріне, саябақтарға, басқа да аллеялар мен скверлерге 2023 жылы 4,5 мың, 2024 жылы 5 мың түп әртүрлі ағаш егілсе, биылғы жылы жоспардағы 10 мың ағаштың 5 мыңы егілді.
Өңір басшысы Ербол Қарашөкеев облыс орталығында жаңадан құрылған екі ауданның тазалығына, абаттандыру жұмысына айрықша назар аударып отыр. Қалада ауқымды жұмыстар атқарылып жатыр. Әуелден жасыл қала ретінде танылған Таразды одан әрі көркейту ісі алдағы уақытта да жалғасын табады.
«Аудан аумағын абаттандыру, санитарлық тазалық жұмысын жүргізу мақсатында біршама тірлік тындырылды. Көшелер мен аулаларда тұрмыстық қатты қалдықтарды шығару, жинақтау, тиісті орындарға жеткізу жұмыстары, көпшілік орындарда санитарлық тазалық іс-шаралары ұйымдастырылып, заңсыз төгілген құрылыс қалдықтары шығарылды. Есепті кезеңде барлығы 24 сенбілік ұйымдастырылып, оларға 10 мыңнан аса адам қатысты, 150-ден аса техника тартылды. Аудан аумағына қарасты көшелер мен арық жүйелері, саябақтар мен қоғамдық орындар тазаланды. Нәтижесінде, 690 тонна күл-қоқыс қала аумағынан тыс арнайы орындарға шығарылды. Сонымен қатар тамыз айында «Ақбұлақ», «Қаратау», «Жайлау», «Салтанат», «Қарасу», «Самал» шағын аудандарында жалпы қалалық сенбілік ұйымдастырылды. Оған барлық қала әкімдігіне қарасты мекемелер қатысып, арық-каналдар тазаланып, талдардың түптері әктелді», деді «Әулиеата» ауданының әкімі Барлық Төреханов.
Облыс орталығында жаңадан құрылған «Жібек жолы» ауданында да санитарлық-тазалық жұмысы талапқа сай атқарылып жатыр. Аудан басшылары акция аясында тұрақты түрде сенбілік ұйымдастыруды қолға алған.
«Аудан аумағындағы аялдамалар, көшелер бойы, аулаларда тұрақты түрде тазалық жұмысы жүргізіліп жатыр. Қыркүйек айының басынан бері шығарылған жалпы қоқыс көлемі – 710 тонна. Сондай-ақ аудан аумағындағы кәсіпкерлік нысандар, мемлекеттік мекемелер өз аумақтарында тазалық жұмыстарын күнделікті атқарып отырады. Көпқабатты тұрғын үйлердің тұрғындарына апта сайынғы сенбілік жөніндегі түсіндіру жұмыстарын дер кезінде қолға алдық», дейді «Жібек жолы» ауданы әкімінің міндетін атқарушы Нұрлан Олжабаев.
Экологиялық акцияға тараздық оқушылар да бір кісідей үлес қосып жатыр. Жақында Тараз қаласындағы №66 «Келешек мектебінің» 7-сынып оқушысы Інжу Дәулет тың бастама көтеріп, қала күні мерекесіне орай өз қолымен өсірген 2 900 түп ағашты тарту етті. Оқушының бұл ісі көпке үлгі болатыны анық.
Тараз
