Милан қаласының «Джузеппе Меацца» стадионында өткен ойын 2:1 есебімен алаң иелерінің пайдасына шешілді. 45-минутта «Интердің» футболшысы Лаутаро Мартинес есеп ашты. Екінші таймда да миландықтар әбден қыспаққа алды. Қақпашы Темірлан Анарбеков бірнеше соққыны сәтті қайтарды. Қорғаныстағы ойыншылар да абдыраған жоқ, қарсыластың шабуылынан барынша қорғана білді. 55-минутта команда капитаны Офри Арад таразы басын теңестірді. Израильдік легионер Чемпиондар лигасының жалпы кезеңінде өткізген матчтарында гол соқтырмай келе жатқан «Интердің» қақпасынан саңылау тапты. Дегенмен көп ұзамай, 67-минутта Карлос Аугусто командасына жеңіс голын тарту етті.
«Қайраттың» бас бапкері Рафаэль Уразбахтин «Интерге» қарсы ойыннан кейін пікірін білдірді.
– Біз әлемнің үздік клубтарының біріне лайықты қарсылық таныттық. Олар өткен маусымда Чемпиондар лигасының финалында сүрінді. Өте тегеурінді ұжымның шабуылына төтеп бердік. Келесі матчты да сырт алаңда өткіземіз. Оған дейін үш аптадай уақыт бар. Жігіттер тынығып, жарақатынан айығып командаға күш қосады, – деді бас бапкер.
«Қайрат» бұған дейін Португалияның «Спортинг» командасынан, Испанияның «Реал Мадрид» клубынан ірі есеппен жеңілді. Кипрдің «Пафос» клубымен тең түсті. Алда әлі төрт матч бар. 26 қарашада Данияда «Копенгаген» клубына қарсы ойнайды, 9 желтоқсанда өз алаңында Грекияның «Олимпиакос» ойыншыларымен
тартысқа түседі. Келесі жылдың 20 қаңтарында Бельгияның «Брюгге» клубын қабылдайды да, 28 қаңтарда сырт алаңда Англияның «Арсенал» клубына қарсы ойнайды.
