Осы ретте Абай облысы санитарлық-эпидемиологиялық бақылау департаментінің (СЭБД) техникалық регламенттерді бақылау бөлімінің басшысы Серікболсын Назарбеков Өңірлік коммуникациялар қызметі алаңында болған брифингте өңірде сатылатын азық-түлік өнімдерінің сапасын бақылау туралы жан-жақты әңгімеледі.
«Санитариялық-эпидемиологиялық бақылау органдары ЕАЭО техникалық регламенттері мен гигиеналық нормативтерге сәйкестігін анықтау үшін өнімге тұрақты мониторинг жүргізеді. Негізгі мақсат – талаптардың орындалуын тексеру. Осы жылдың 10 айында сала мамандары 784 тауарды тексерді, оның 441-і – азық-түлік: сүт, нан-тоқаш, құс еті, жұмыртқа, кондитер өнімдері. 42 тауар техникалық регламентке сәйкес келмеді», деді С.Назарбеков.
Облыстық СЭБД-ның тамақ объектілерін бақылау бөлімінің басшысы Айгерім Мұсатаеваның айтуынша, тағам өнімдерін дайындау барысында аса мұқият болатын біраз жайт бар.
«Бүгінде жиі кездесетін улану түрі – зиянды микроағзалар. Мұндай ауру тудыратын бактериялар өнімге бастапқыда жұғуы немесе дұрыс сақталмауы мен дайындалуы салдарынан пайда болады. Организмге түскен жағдайда улануға әкеледі. Инфекция тасымалдаушылар тарақан, тышқан, егеуқұйрық, шыбын болуы мүмкін. Тағамнан уланудың алдын алу қарапайым гигиена сақтау, дайындау ережелерін орындауға байланысты. Егер тағамнан жағымсыз иіс шықса немесе қышқыл дәм сезілсе, ондай өнімді тұтынбаған жөн. Қаптаманың ісінуіне де назар аударыңыз, бұл да өнімді жеуге болмайтынын білдіреді», деді А.Мұсатаева.
Маманның айтуынша, ішек инфекцияларының көптеген түрін толық жоюға кемінде 10 минут термиялық өңдеу қажет. Температура 70 градустан төмен болмауға тиіс. Дәл осы температурада қауіпті бактериялар жойылады.
«Тағамды бөлме температурасында екі сағаттан артық сақтауға болмайды, әйтпесе ішек инфекциясына шалдығу қаупі артады. Өнім толық өңделуге тиіс, сондықтан қайнатылған ет қуырылған етке қарағанда қауіпсіз. Сондай-ақ өнімдер кір қол арқылы да ластануы мүмкін екенін естен шығармау керек. Барлық шикі тағам алдын ала өңдеуден өтуге тиіс, көкөністер мен жемістерді ағын сумен жақсылап жуу қажет. Тауық жұмыртқасы сальмонеллез тасымалдаушысы болуы мүмкін», дейді А.Мұсатаева.
Сонымен қатар тауар тасымалдау ережесін қатаң сақтау керек. Шикі, дайын өнімдерді бір-бірінен бөлек сақтау, сонымен қатар дайын тамақты тоңазытқышқа қою алдында міндетті түрде суыту қажет. «Ішек инфекцияларын көбейту қаупі, әсіресе, көше саудасында жоғары. Өнімді рұқсат етілген жерден ғана сатып алу керек, себебі ветеринарлық жағдайы белгісіз тағам өнімдері инфекцияға себеп болуы мүмкін», дейді маман.
Облыстық СЭБД басшысының орынбасары Раушан Фатхуллина қазан айында Семейде баланың кәмпиттен улану оқиғасы тіркелгенін айтты. Оқушы дүкеннен кәмпит сатып алып, оны жегеннен кейін өзін нашар сезінген.
«Микробиологиялық зерттеу нәтижесінде кәмпитте ішек таяқшасы тобының бактериялары анықталды. Сонымен қатар өнімде қазақ тіліндегі таңбалау болмаған, құрамы мен жарамдылық мерзімі көрсетілмеген. Дүкенде тауарға ілеспе құжаттар, сапаға сәйкестік декларациясы, басқа да құжаттар болмаған. Кәсіпкер кәмпиттерді қолма-қол ақшаға көтерме базардан алғанын айтқан. Аталған фактіге қатысты жеке кәсіпкерге әкімшілік хаттама толтырылды, қалған өнім тәркіленіп, жойылды», деді Р.Фатхуллина.
Қоректік заттардың жетіспеушілігі, құрамында бактериялар мен химиялық қоспалардың мол болуы адам денсаулығына зиян дейді мамандар. Сондықтан әрбір өнімнің шығу тегін, сақтау шарттарын, өндіріс сапасын қатаң қадағалау маңызды.
Абай облысы
