Күні кеше ол Алматыға жетті. Республика сарайында ұйымдастырылған іс-шараға Италияның әйгілі футболшысы, 2006 жылғы әлем чемпионы, 2010 жылғы клубтық әлем біріншілігі мен УЕФА Чемпиондар лигасының жеңімпазы, басқа да көптеген атақтың иегері Марко Матерацци қатысты. Апеннин түбегінен келген тасқамал қорғаушы «Trophy Tour» туры туралы әңгімелеп, осы істің мән-маңызына кеңінен тоқталды, журналистер мен жиналған қауымның сан алуан сұрақтарына жауап қайтарды.
Жиынға Марко Матерацциден бөлек, ФИФА делегациясы, Алматы қаласы әкімдігі, футбол федерациясының өкілдері, осы турдың ұйымдаструшысы «Coca-Cola» мен «CCI» компанияларының бас директорлары – Серкан Дилек пен Вели Динчел қатысты. Салтанатты рәсім аяқталған соң БАҚ өкілдері мен басқа да қатысушылар Әлем кубогімен естелік фотоға түсті.
Әлем кубогінің салмағы – 6,142 кг. Мүсін 18 каратты таза алтыннан жасалған. Бұл кубокті кезінде дүниежүзілік доп додасында теңдессіз деп танылған командалардың аты аңызға айналған аяқ доп шеберлері төбесіне көтерді. Соңғы рет 2022 жылы Қатарда ұйымдастырылған жарыста Аргентина құрамасы топ жарды. Сол кезде алтын мүсін жүзі бал-бұл жайнаған даңқты Лионель Мессидің қолында болды. Негізі ол Швейцарияның ФИФА музейінде сақталып, тек әлем чемпионаты өтетін жылы ғана сыртқа шығарылады. Алдымен әлемді шарлайды, содан кейін чемпионатты қабылдайтын мемлекетке жеткізіледі. Финалдық матчтан соң кубок бас жүлдені олжалаған командаға табыс етіледі. Салтанатты рәсім аяқталғаннан кейін тұпнұсқа қайта музейге қайтарылып, жеңімпаздарға кубоктің көшірмесі табыс етіледі.
