Жастардың шығармашылық, зияткерлік және әлеуметтік әлеуетін ашуға бағытталған кешенді іс-шаралар студенттердің тікелей қатысуымен жүзеге асырылып, олардың бастамашылдығын және азаматтық ұстанымын айқын көрсетті.
Қаладағы 35 жоғары оқу орнында 150-ден астам іс-шара өтіп, 40 мыңнан астам студентті қамтыған. Шығармашылық кештер, интеллектуалдық ойындар, спорттық және экологиялық акциялар, қайырымдылық бастамалардың әрбірінің өзіндік тақырыптық бағыты болды.
«Заң және тәртіп», «Таза Қазақстан» акциялары аясында Taza Campus челленджі, StudSport олимпиада жүлдегерлерінің дәрістері, Jas IQ зияткерлік ойындары, кинокөрсетілімдер мен акустикалық кештер өтті. Сонымен бірге «Алматының үздік студенттік тобы» анықталып, байқаудың жүлде қоры 1 миллион теңге болды.
Айта кетейік, шаһардағы 35 жоғары оқу орнында 210 мыңнан астам студент білім алып жүр. Алматы елдегі ең ірі білім беру орталығы, жас буынды жаңа белеске ынталандыратын білім қаласы.
