«Әуежайдың қалпына келтірілуі облыстың әлеуметтік-экономикалық дамуына жаңаша серпін әкеледі. Тарих тұнып жатқан Торғай өңірінде туризмді дамытуға мүмкіндік береді», дейді Көлік министрі Марат Қарабаев.
Қазір Арқалық әуежайының жобалау-сметалық құжаттамасы әзірленіп жатыр. Аталған құжатқа сәйкес жалпы ауданы 3 200 шаршы метр болатын, сағатына 70 жолаушыға қызмет көрсетуге қабілетті қос қабатты жаңа әуежай кешенін салу көзделіп отыр. Ұзындығы 2,5 мың метр ұшу-қону жолағы, такси жолы мен перрон жөнделеді. Сондай-ақ аэронавигациялық және метеорологиялық жабдықтарды сатып алуға қаражат көзделген. Қостанай, Астана және Алматыға қолжетімді бағамен субсидияланатын рейстерді іске қосу жоспарланған.
Әуелі Арқалықтан облыс орталығы Қостанай қаласына, Астана мен Алматыға әуе рейстері ашылады. Мамандардың пікірінше, Үкімет субсидия бөлетіндіктен, жолаушылар үшін әуе билеттерінің бағасы да қолжетімді болмақ. Бастапқы жобада Арқалық әуежайын қалпына келтіруге 8 млрд теңгеден астам қаражат қажет.
«Қазір ұшу алаңы мен перрон жобасын жасап жатырмыз. Терминал ғимараты апатты жағдайда. Оны түгел сүріп тастап, жаңа ғимарат саламыз. Сәуір айында жобаны аяқтап, мамыр айында сараптамаға жібереміз. Қазіргі есеппен алсақ, әуежай құрылысына 8,3 млрд теңге қаржы керек. Бірақ бұл сома жоба құжаты экспертизадан өткен соң, тағы да нақтыланады», дейді облыстық Жолаушылар көлігі және автомобиль жолдары басқармасы басшысының орынбасары Болат Сейдахметов.
80-жылдардың басында қаладан 7 шақырымдай жерде салынған әуежай 1998 жылы жұмысын тоқтатқан. Бұған дейін арнайы автобус, такси толастамайтын бұл нысанға бүгінде ешкім ат ізін салмайды. Бұрынғы аэровокзал ғимаратының кірпіштері де ұстағанның қолында, тістегеннің аузында кетіп, қирағаны қирап, қазір құр қаңқасы ғана үңірейіп тұр. Кезінде «Ил», «Ту» ұшақтарын қабылдап, ұшырып жататын ұшу-қону алаңы да тозып біткен. Арқалық тұрғындарының айтуынша, кезінде әуежай халықаралық әуе рейстерін де қабылдаған.
Әбден қирап, бүлінген нысан 2020 жылы бастапқы құны 30 млн теңгеге бағаланып, аукцион арқылы жекеменшікке өтіп кеткен. Алайда меншік иесі әбден тозығы жеткен әуежай ғимаратын қайта сатпақ болып, ол туралы хабарламаға нысанның астық қоймасына арналған фазендаға қолайлы екенін жазып қойған. Бұған өңір тұрғындары наразы болып, құзырлы орындарға бос жатқан аумақ әуе қатынасы үшін әлі де қызмет ете алатынын айтып шағым түсірген. Алайда көпке дейін жабулы қазан жабулы қалпында қалды.
«Әуежай айлағының инфрақұрылымы, техникалық мүмкіндігі соған сай еді. Осы аэропорт, одан әріректе бес қабатты ғимарат болды, одан кейін жанармай бекеті, аэронавигациясы болды. Автопарк те осы маңда тұратын. Мынау жолақтармен үлкен әуе кемелері ұшып жататын. Ұшақтар дәл осы жерге қонатын. Отыз жылдан бері көптің көкейінде жүрген, алайда шешілуі өте қиын мәселе еді. Айта-айта, тіпті, күдер үзе бастаған едік. Президенттің аузынан әуежай салынады дегенді естігенде қуанғанымыздан төбеміз көкке жеткендей болды», дейді қала тұрғыны Мақсұт Рахилин.
Өңір тұрғындарының айтуынша, Президент пәрменімен қолға алынып жатқан Орталық – Батыс күре жолы мен Арқалық әуежайы Торғай өңірінің тынысын ашып, әлеуметтік-экономикалық дамуына серпін береді. Сондай-ақ кәсіпкерлік пен туризмнің өріс алуына, өңірде авиацияны, оның ішінде шағын авиацияны дамытуға мол мүмкіндік береді.
Арқалық әуежайы Амангелді, Жангелдин аудандарының аумағында жатқан «Алтын дала» мемлекеттік табиғи резерваты үшін де қолайлы болмақ.
«Жұмыс бабымен Астана, Қостанай, Алматыға жиі барамыз. Енді жол қысқаратын болды. Оның үстіне, бізге шетелден орнитолог мамандар көп келеді. Оларға да қолайлы болады. Одан кейін былтыр, резерват аумағына керқұлан жібергенде, жануарларды әкелген тікұшақты ескі әуежайдың ұшу жолағын жөндеп, сол жерге қондырдық. Енді жаңа әуежай іске қосылса, аңшылық, саятшылық туризм дамиды, бізге де, халыққа да тиімді болады», дейді табиғи резерваттың директоры Дүйсенғали Қалибекұлы.
Қостанай облысы
