Тимофей – өте жауапты бала. Ауылдағы өзге тұрғындар тәтті ұйқыда жатқан ала таңда кішкентай тәртіп сақшысы алғашқы болып оянады. Төсегінен тұра сала жуынып, үстіне өзіне шақтап тігілген полицей киімін киеді. Иығына ойыншық автоматын іліп алып, көше аралауға шығады.
Ол бүгін де ерте тұрды. Киімін киіп далаға шықты да, аулада қаңтарулы тұрған темір досы – «Орленок» велосипедіне мінді. Әскери жорыққа аттанғалы тұрған офицерлерше тұлпарының рулін сипап, еркелетіп қойды.
«Барлығы біздің бақылауымызда, достым. Қанекей бақылауға аттанайық», деп педаліне аяқ салды.
Ауыл халқы енді ғана ояна бастапты. Тимофей әуелі мектеп аумағын айналып, барлығы дұрыс екеніне көз жеткізді. Одан соң күнделікті дағдысына орай дүкен, пошта ғимараттарын сүзіп өтті. Ауыл ішіндегі тыныштықты әдетте Саша ағайдың қаздары қаңқылдап бұзатын. Енді сол жаққа аттанып бара жатыр еді, кенеттен иесіз қалған үй жақтан бөгде дыбыстар естігендей болды. Сақшы бала кілт тоқтады. Велосипедінен атып түсіп, дыбыс шыққан жаққа жүрді.
– Бұл жерде кім бар?
Біраз үнсіздіктен соң әлгі үйдің ауласынан көрші үйдің Васькасы зытып шыға берді. Әлгі жерде жем іздеп жүрген көршінің тауықтары мысықты қыт-қыттап қорқытып жіберген екен.
– Уф, сен екенсің ғой, Васька. Жарайды, бәрі тыныш болса болғаны.
Тимофей ауыл ішін кезіп жүріп түс уақыты болып қалғанын білді. Өзінше айтқанда «түскі үзіліс». Анасы бұл сүйіп ішетін көжесін дайындап қойыпты.
– Иә, офицерім, ауылдағы жағдай қалай екен? – дейді күлімдеп.
– Барлығы тыныш, анашым, ауыл іші менің бақылауымда ғой, – деп мақтанышпен танауын бір тартып қойды.
Түстен кейін ол үшін екінші ауысым басталады. Ата-әжелердің жолдан өтуіне көмектеседі, көше қиылыстарында жүргізушілердің бағытын реттеп жібереді. Мына жақта ойнап жатқан балалардың анда-санда қиыс ұшқан доптарын ұстап алып әкеліп береді де, көше бойында доп тебуге болмайтынын ескертеді.
Тәртіп сақшысы кешкілік үйіне шаршап оралса да көңілі тоқ. Себебі оның әр күні небір қызық оқиғаларға толы, ең бастысы, ауыл ішінде тәртіп орнаған. Ендеше, Тимофейдің мақсатының орындалғаны.
Ұйқыға жатар алдында Алтай ауылының кішкентай тәртіп сақшысы киімдерін орындыққа әдемілеп іледі де:
«Ертең жаңа күн басталады, ендеше мені жаңа міндеттер күтіп тұр деген сөз. Мұғаліміміз тәртіп өз-өзінен орнамайды дейтін, ендеше учаскелік полицей Рүстем ағайға менің көмегім ертең де керек деген сөз», деп айтатын әдеті бар.
Ал ауылдық инспектор, полиция майоры Рүстем Иманбаев Тимофей Столбовойды қоғамдық тәртіпті сақтау ісіндегі белсенді көмекшісі деп таниды. Баланың полиция қызметіне қызығушылығы ерекше. Ол болашақта ел тыныштығын күзететін офицер болуды армандайды. Тәртіпке деген ынтасы мен жауапкершілігі ауыл тұрғындарын ерекше сүйсіндіреді. Тимофей – ауыл балаларына үлгі. Оның әрбір күні – тәртіп пен тәрбиенің жарқын көрінісі.
Павлодар облысы,
Тереңкөл ауданы,
Алтай ауылы
