NU Park университет студенттері мен қызметкерлеріне ғана емес, қала тұрғындары мен қонақтарының тынығуына, серуендеуіне таптырмайтын орынға айналмақшы. Шығармашылықпен шұғылданатын, ғылым-білімге құштар жастарға да арнайы орындар болады. Жоба – университет басшылығы бастамашылық еткен «Қолжетімді кампус» бағдарламасының бір бөлігі. Бағдарлама қала тұрғындарына ашық, қолайлы, қолжетімді орта құруға бағытталған.
«Жобаны жоспарлайтын кезде біз әйгілі жапон сәулетшісі Кисё Курокава әзірлеген қала құрылысы тұжырымдамасын басшылыққа алдық. Соған сай үйлесімді интеграцияға негізделген саябақ кеңістігін құрып жатырмыз. Саябақ жастардың белсенді демалысына, ересектердің тыныштықта уақыт өткізуіне де жайлы, ыңғайлы болады. Маңыздысы, әркім өзіне қолайлы орында серуендей алады. Біз саябақтың елорданың тағы бір жаңа, тартымды демалыс орнына айналатынына сенімдіміз. Ірі қаланың дәл ортасында әсем табиғатты тамашалап, шығармашылыққа ден қоюға әрі отбасымен, достармен уақытты көңілді өткізуге мүмкіндік туады», дейді NU президенті, профессор Вакар Ахмад.
Заманға сай жабдықталатын саябақтың аумағы шамамен 45 гектар жерді алып жатыр. Онда фуд-корт, этноауыл, теннис академиясы, ат спорты мектебі, футбол орталығы, жұмыс істеуге, кітап оқуға қолайлы аймақ, шығармашылық шеберханалар мен көрме алаңдары бар арт-хаб, тағысын-тағы орындар қарастырылады. Саябақтың орталық нысаны – қазақы ою пішініндегі жасыл лабиринт. Сонымен қатар ашық аспан астындағы амфитеатр, Шығыс мәдениеті орталығы, қайта жаңғыртылған пирамидалық екі ғимаратта түрлі мәдени іс-шара ұйымдастырылады.
Ірі жоба екі жылда аяқталып, пайдалануға беріледі. Биылдың өзінде аумақтағы 15 гектар жер тазартылған. Жұмысшылар топырақты қопсытып, тыңайтқыш сепкен. Көгал егіп, алты су ұңғымасын бұрғылаған. Тал, терек, үйеңкі, қарағаш, бөртегүл, қарағай, шырша сынды 85 000-нан астам ағаш пен бұта егілген. Тіпті кампус пен қаланы көгалдандыруға қажетті көшеттер өсірілетін 200 шаршы метрлік жылыжай салынып қойған. Саябақ құрылысының алғашқы кезеңі 2026 жылы аяқталады деп жоспарланып отыр. Осы кезеңде үш жылыжай, бау-бақша орталығы, велосипед, жаяу жүргінші жолдары салынады. Қаладан ашылғалы жатқан саябақтың жоба-жоспары осындай.
