Спорт • 12 Қазан, 2010

Дерек пен дәйек

596 рет

көрсетілді

3 мин

оқу үшін

Egemen Qazaqstan

272 000 000 000 Өңір халқын ауыз сумен қамту бағдарламасына осыншама теңге қажет Өңірдегі коммуналдық құрылымдар бойынша жылумен қамту – 63, электрмен қамту – 70, ауыз сумен қамту 64 пайызды құрайды. 2011-2020 жылдары ауыз сумен қамтамасыз ету бағдарламасының жобасын жасау қолға алынса, қажетті қаржының 77 пайызы жеке құрылымдар есебінен жабылатын болып отыр. Алдағы жылдан қолға алынатын бағдарламада коммуналдық желілерді ауыстыру мен жөндеу жұмыстарына барынша көңіл бөлінбекші. Сондай-ақ ауылдық және қалалық сумен қамту жүйелерін тексеру мәселесіне де назар аударылған. Бағдарламаны жүзеге асыру үшін 272 млрд. теңге қаржы қажет болса, ол бюджет пен инвестициялық тариф, тағы басқа көздерден жинақталмақшы. Күмісжан БАЙЖАН. Алматы облысы. * * * 308 000 000 Ақмола облысында ұйымдастырылған 286 жәрмеңкеде осынша теңгенің жергілікті тауары төмен бағамен сатылды Облыстық кәсіпкерлік және өнеркәсіп басқармасының бастығы Марат Қойшыбаевтың айтуынша, тұтыну рыногындағы бағаның негізсіз көтерілуіне жол бермеу мақсатында құрылған штаб қайта өңдеу, сауда ұйымдары басшыларымен 90-ға жуық мәжіліс өткізіп, 248 меморандумға қол қойылған. Қазір 7000-нан астам сауда кәсіпорындары халыққа қызмет көрсетуде. Жыл басынан есептегенде, жалпы тұтыну құнының индексі 103,8 пайызды құраған. Бұл – республикалық орта көрсеткіштен біршама төмен. Биылғы қуаңшылық пен табиғаттың тосын құбылысы азық-түлік тауарларының бағасына айтарлықтай әсер етпейді. Өйткені, облыстың астыққа деген сұранысы 100 мың тоннаға тең болса, алқаптардан жиналған бидай одан асып түскен. Бақберген АМАЛБЕК. Ақмола облысы. * * * 1 419 000 Ақтөбелік мал азығын дайындаушылар қысқа түсетін малға осыншама тонна пішен қорын жасап алды Бұл жылдық қажеттілікке шаққанда 120,6 пайыз құрайды. Бұған мал азығын дайындаушыларға берілетін жанар-жағар майды жеңілдікпен бөлудің, науқан кезінде жоғары көрсеткішке жеткендерді ынталандыруға қаржы қарастырудың істің нәтижелі аяқталуына ықпал еткені сөзсіз. Сөйтіп, көптеген аудандар жылдық тапсырманы асыра орындады. Сондай-ақ, облыста жем қорын жасау да назарда ұсталуда. Осы кезге дейін қажетті жемнің 70 пайызы құйылды. Бұл бағытта Әйтеке би, Байғанин, Ырғыз, Қобда және Ойыл аудандары ыждағаттылық танытып отыр. Облыс әкімі Елеусін Сағындықов үстіміздегі жылғы 1 қарашаға дейін жемнің қысқа жететін мол қорын жасап алуға тапсырма берді. Сатыбалды СӘУІРБАЙ. Ақтөбе облысы.