Инфографиканы жасаған – Зәуреш СМАҒҰЛ ,«EQ»
Сауалнама 11 шілде мен 12 тамыз аралығында ұйымдастырылған. Оған еліміздің 17 облысынан және республикалық маңызы бар – Астана, Алматы, Шымкент қаласынан 18 жастан асқан 8 мың азамат қатысқан.
Әлеуметтік зерттеуде респонденттердің 75,9%-ы еліміз қазіргі уақытта дұрыс бағытта дамып келеді деп есептейтінін атап өткен. Сауалнамада қоғамдағы оптимизмнің деңгейін де анықтады. Ең жоғары сенім көрсеткіші 18 бен 29 жас аралығындағы азаматтар арасында тіркелген. Ал жас ұлғайған сайын болашаққа деген сенім біршама төмендей түсетіні байқалған. Мәселен, 61 жастан асқан респонденттердің тек 70,6%-ы елдің болашағына сенім білдірген.
Бір қызығы, мемлекеттің даму бағытын оң бағалауда ауыл тұрғындарының көрсеткіші қала тұрғындарынан жоғары болып отыр. Бұл ауылдық жерлерде жүргізіліп жатқан әлеуметтік реформалардың нақты әсерін аңғартса керек.
Елдің дұрыс бағытта дамып келе жатқанын қолдаған респонденттердің басым бөлігі қазірдің өзінде нақты жүзеге асырылып жатқан бірқатар маңызды реформаны атап өтті. Бұл ретте ауылдық және қала мектептерінің салыну мен жаңартылуы, «Ұлттық қор – балаларға» бағдарламасының іске асуы, БЖЗҚ-дан
қаражаттың бір бөлігін шешіп алу мүмкіндігі аталды. Одан бөлек көпшілігі мемлекеттік қызметтердің цифрлық форматқа көшуін, отбасының цифрлық картасын, әлеуметтік әмиянның бар екенін білетінін жеткізген. «Заң және тәртіп» қағидаты мен «Таза Қазақстан» жалпыұлттық акцияларын да ерекшелеп айтқан.
Бұл көрсеткіштер азаматтардың өз өмірінде нақты өзгерістерді байқап отырғанын дәлелдейді. Яғни жүргізіліп жатқан реформалар халықтың күнделікті тұрмысына тікелей әсер етіп, мемлекеттік саясатқа деген сенімді күшейтіп, болашаққа деген оптимизмді арттырып отыр.
Экономикалық реформалар мен әлеуметтік бастамалардың тиімді іске асуы ел басшылығына деген қоғамдық сенімнің артуынан көрініс табуда. Сауалнама нәтижелері бойынша респонденттердің 82,4%-ы Президентке сенім білдірген.
Сонымен қатар қоғамда патриоттық көңіл күйдің де айтарлықтай өскені байқалады. Зерттеуге қатысқан азаматтардың 89,9%-ы Қазақстанмен және осы елдің азаматы болғаны үшін мақтанатынын айтқан. Оның ішінде 49,1%-ы «өте мақтанамын» десе, 40,8%-ы «мақтанамын» деп жауап берген.
Ел болашағына қатысты респонденттердің көпшілігі еліміздің өңірлік қана емес, жаһандық деңгейде де көшбасшы бола алатын салаларын атап өткен. Мәселен, агроөнеркәсіптік сектор, цифрландыру және жасанды интеллект, энергетика, көлік және транзит, адам капиталды дамыту – ең перспективалы бағыт.
Зерттеу барысында қоғамдағы құндылық ұстанымдарға да талдау жасалған. Мәселен, сауалнамаға қатысқан азаматтардың 80%-ы елімізде ЛГБТ насихатына заң жүзінде шектеу қоюды қолдайтынын білдірген. Бұл қоғамның ұлттық құндылықтар мен дәстүрге бейімділігін көрсетеді.
