Мүсін авторы – Қашар кентінің тұрғыны, кен байыту саласында жұмыс істейтін қолөнер шебері Бүркіт Керімбаев.
«Арғы аталарым зергер, ұста кісілер болған. Қанда бар қабілет болса керек, арнайы кәсіби білім алған адам емеспін. Өзбекстаннан қоныс аударған жылдары Тараздың маңындағы Қаратау деген шағын қалашықта 7 жыл тұрдым. Тұрақты жұмысым болмаған соң, асық, киіз үй, сандық, үкі, аю кейпіндегі неше түрлі тиын-тебен жинағыш кәдесыйлар жасап саттым. Таза былғарыдан әмиян, басқа да бұйымдар жасаймын. Былғары бұйымдардың сыртына ойып сурет салып, безендіремін. Тапсырыс бойынша қамшы өремін. Ал жастайымнан машықтанған негізгі кәсібім – түйекеш», дейді қолөнер шебері.
Қашар тұрғындары ұста деп атап кеткен Бүркіт ағамыз Алаш көсемінің мүсінін қалыптауға тура бір ай уақыт жұмсапты. Мүсін гипстен жасалған.
Қостанайдағы Әлихан Бөкейхан атындағы мектеп директоры Жанар Асанқызының айтуынша, бюстің астыңғы тұғыры Асхат Ыбыраев есімді жиһаз шеберінің қолынан шыққан. Мүсіннің ашылу салтанатына халық көп жиналып, соңы Әлихан Бөкейханның қайраткерлігі мен асыл мұрасына арналған ғылыми конференцияға ұласқан.
«Асхат деген шебер әрі кәсіпкер жігіт біраз жиһаз жасап, мектепке сыйға тартқан. Соған хабарласып, «Мүсіннің астына ағаштан әдемілеп тұғыр жасап бере аласың ба? Құны қанша болады?» деп едік. Ол «Әлихандай арыстың мүсінін орнатамын десеңіз, тегін жасап беремін», деп қуантып тастады. Алдағы уақытта Алаш көсемінің атындағы мектеп музейін ашқымыз келеді», дейді Жанар Асанқызы.
Қостанай облысы
