2016 жылдан бері ұйымдастырылып келе жатқан әдеби байқауға осы уақыт аралығында еліміздің жүздеген қаламгері қатысып, таңдаулы шығармалардың авторлары әр жанр бойынша түрлі жүлдеге ие болды.
Шара шымылдығын түрген «Ауыл» партиясының төрағасы Әли Бектаев әдеби байқаудың маңыздылығын, ауылдағы өзекті мәселелердің шығарма тілінде халыққа тарауын, ауылдың айшықты тұстарын айтып, қаламгерлерге ризашылығын білдірсе, Парламент Мәжілісінің депутаты Сауытбек Абдрахманов әдеби бәйге дарынның арынын ашуға үлкен септігін тигізетінін айтып, игілікті шараның маңыздылығына тоқталды.
Танымал қаламгерлер мен әдебиеттанушы ғалымдар қазылық еткен әдеби байқауға биыл 288 қаламгер өтініш білдіріп, поэзия, проза, драматургия аталымдары бойынша шығармаларын ұсынған. Оның ішінде проза жанрында – 113, драматургия – 25, поэзия жанры бойынша 150 туынды келіп түскен. Ұйымдастырушылар алқасы атап өткендей, қазылар жыл бойы әдебиет порталында онлайн түрде жарияланған шығармалардың ішінен үздік туындыларды анықтаған. Қаламгерлер қауымы мен «Ауыл» партиясы аймақтық өкілдіктерінің өтініштері бойынша 2018 жылдан бастап әдеби байқауға орыс тілді қаламгерлер де қатысқанын айта кеткен жөн.
Бір айта кетерлігі, биыл байқауға еліміздің белгілі қаламгерлері Бауыржан Үсенов, Мұқағали Мақатаев, Нұрлан Мәукенұлы, Төлеген Айбергенов, Ақселеу Сейдімбек, Шерхан Мұртаза, Иван Глухов, Шахмет Құсайынов, Сафуан Шаймерденов, Қалихан Ысқақ атындағы қосымша 10 арнайы жүлде берілді.
Байқаудың негізгі шарты бойынша жеңімпаздар мен жүлдегерлер арасынан ең үздік шығарма авторы «Алтын Тұғыр» сыйлығымен марапатталды. Аталмыш жүлдеге қарымды қаламгер Ерболат Баятұлы драматургия саласы бойынша лайық деп танылды. Проза жанры бойынша жазушы Құрманжан Қасымжанұлы, поэзия аталымы бойынша ақын Қуаныш Оспан бірінші орын алды.
